එහෙත් ඩොමේන් නේම් එකෙහි හිමිකරුගේ කිසිදු අනුදැනුමකින් තොරව එහි හිමිකාරීත්වය බලහත් කාරයෙන් ලබා ගැනීම ඩොමේන් Hijack කිරීම ලෙස හඳුන්වයි. එවිට අදාළ ඩොමේන් එක සඳහා විවෘත වන වෙබ් අඩවිය Hijack කල තැනැත්තාගේ අවශ්‍යතාව අනුව වෙනස් කළ හැකිය.
මෙසේ කරන පුද්ගලයන්, අදාළ ඩොමේන් නේම් එක ලියාපදිංචි කළ වෙබ් අඩවියට පිවිස එහි නියම හිමිකරුවා ලෙස පෙනී සිටිමින්, එහි පාස්වර්ඩ් අමතක වූ බව දන්වයි. එවිට ඩොමේන් රෙජිස්ටර් වෙබ් අඩවිය විසින් තොරතුරු විමසා බැලීමක් කරයි. මෙම තොරතුරු විමසුමට ලබා දෙන පිළිතුරු, එම ඩොමේන් නාමය ලියාපදිංචි කිරීමේදී ලබාදුන් විස්තර සමඟ ගැලපේ නම්, අලුත් පාස්වර්ඩ් එකක් ලබා දෙයි.
මෙසේ ඩොමේන් නේම් හයිජැක් කිරීම පහසු වීමට බලපා ඇත්තේ ඒවා ලියාපදිංචි කරන වේලාවේදී බොහෝ දෙනා අසත්‍ය සහ සරල තොරතුරු ඇතුළත් කිරීමයි. එසේ ඇතුළත් කරන තොරතුරු සමහර විට තමාටම පසුව අමතක වී යයි. අනෙක් අතට හයිජැක් කිරීම ප්‍රගුණ කළ අයට එම විස්තර පහසුවෙන් අනුමාන කළහැක.
කෙසේ වෙතත් හයිජැක් කළ ඩොමේන් නේම් එකක අයිතිය එහි මුල් අයිතිකරුට නැවත ලබා ගැනීමට පුළුවන. ඒ සඳහා තම හිමිකාරීත්වය ඩොමේන් නාමය ලියාපදිංචි කළ ආයතනයට පෙන්වා සිටිය යුතුය. ඒ සඳහා ඩොමේන් නාමය ලියාපදිංචි කිරීමේදී මුදල් ගෙවූ ක්‍රෙඩිට් හෝ ඩෙබිට් කාඩ් අංක යනාදිය හෝ එම සමාගමෙන් ඉල්ලා සිටින වෙනත් තොරතුරු ලබා දිය යුතුය.
